尋日講到，大師兄話「係廟街幫人睇相嘅人係有秘訣嘅。」
但係佢又無講係乜秘訣，咁我惟有出絕招話請佢食飯啦﹗不過就被佢疾，佢笑笑口話﹕「乜你睇得我咁貪心，連晚餐都要屈你請我食咩﹗」
大師兄笑完先講︰「
一般到廟街睇相既人，會比起到廟街搵人睇風水嘅人多好多。不過如果廟街師傅睇相睇得準，d客就有可能會搵佢地睇風水。
響廟街睇相嗰位師弟所講嘅秘訣，最緊要係兩個字──令客人開心。
個客坐低果一刻，就要諗下點樣令佢開心。而大多數人，都希望日後會更好，所以同客人講而家係捱世界，日後會大器晚成。
或者話個客雖然懷財不遇，而遲d行運，就會有貴人幫，自然扶搖直上。
總之要令個客開心，即使個客話想聽d衰野，都千祈唔好信個客，響廟街睇相嘅一位師弟話，試過有客話問凶不問吉，但一話佢運程差，個客就走人劈炮，錢都無比。
所以，喺廟街睇相，最緊令要個客開心。所以，鑑貌辨色，比真係識睇相更加重要。」
大師兄仲話呢d師弟黎跟師傅學嘢，多數會先學風水，因為嗰時風水已經開始流行，師傅又寫左好多書，好多讀者睇過d風水書，都會對風水略知一二。有d客講起風水嚟仲叻過佢地，令佢地明白自己d風水知識仲貧乏過d客。為免被d客問到腳都軟埋，所以咪跟師傅學多d風水囉！
風水玄學權威白鶴鳴弟子/方中圓
2016年5月7日
＞＞＞｜上一頁｜
.jpg)